1370 ـ جی ایلده تبریزلی "افشـار" تخلّوصلو مدنیّت خادیمی رضـا افشـارپـور واسطه سیله آذربایجان مدنیّتی بیردن بیره  "گجیل قاپیسی" تاماشاسیله پارلاماغا باشلامیشدیر. او1371 ـ جی ایلده شرقی آذربایجان عموم ایش و اجتماعی ایشلر اداره سینده "مدنی ایشلرمسئولو" وظیفه سینی داشیدیغی حالدا بیر سیرا یئنی لیک لره ال آتدی.مولانا "فضولی" آدینا اوچ بؤیوک آددیم آتماق ایسته دیگی حالدا "آذربایجان" خاصّه "تبریز" ضیالی لاری دورمادان اونا یاردیم ائتمکده اللریندن گله نی اسیرگه مه دیلر.فضولی آدینا کتابخانا ،ادبی انجمن و آرتیق 300 نفری احتوا ائتمیش هونری گروه بیرـ بیرینین آردینجا تبریز و آذربایجانا پای وئریلدی. ایلک رسمی آشیق اورکستری  "ساری تئل"  آدی له یارانیب و ائله همین گروه واسطه سیله تبریز رادیو ـ تلویزیونوندا ایلک موسیقی نوارا آلینیب و رسمی حالدا تهران دان تأیید ائدیلدی ، ایلک قیزلار اورکستری چئشیدلی یاش و ساوادلاردا فعالیّته باشلادی ، تبریز رادیوتلویزیونوندا "تولکو ناغیلی" آدلی ایلک ادبی  اوشاق تاماشاسی یاراندی ، ایلک ناغارا آنسامبیلی واونلارجا ایلک ایشلر گؤروندو. بو حرکت ؛  وقتیله بیر پارا مسئولیّت سیز مسئول لار طرفیندن تاپدالانیب ، محو ائدیلمک ایسته نیلن کیمی  در حال ادیب ، شاعیر و مدنیتچی لریمیز طرفیندن قاطعیت له مدافعه ائدیلیردی. وبلاگیمیزین همین پستوندا بو دفاعیّه لـرین  ان قدرتلیسینی شریف قوللوغونوزا پای وئریرم. نوبتی بو سایی دا مدنیتیمیزین بؤیوک اوستاد آراشدیریجی وشاعیری حاج موسی هریسی نژاد (هـریسـی) نین شعری اؤز آخیجی و قدرتلی مقدّمه سیله بیرلیکده شریف محضرلرینیزه اتحاف ائدیلیر:

قالانین « تبریزده فضولی آدینا» وبلاگیندا اوخویا بیلرسینیز

سئکوریت قاپی آرخاسیندان ائشییه دوورورام . خیابان قیراغیندا ایشیق ساچلاریندان سیغال آلان ساللاق سؤیود بوداقلاری اوزه رینده  ایکی قارا کپه نک ال - اله وئرمیش کیمی اویناشاراق اوچوشورلار . من یوموشاق بیر اوتوراجاغا باتاراق اللریمی باشیمین آرخاسینا هؤرموشم  . کولئر ایشله ییر . هاوا قیزاراق اؤزوندن چیخسادا منه بیر شئی ائله یه بیلمیر . بیر اوجا بوی ، نرمه نازیک قیز خایلاغی  یئنی یئتمه دورنا کیمی سکیر خیاباندا . یانیندا گئندن قیر قابینا بنزه ین قارا چادرالی بیر قادین هئلله نه – هئلله نه گئدیر.  یاخینلیقدا ، تیکینتی ده ایشله ین ساری باش بیر گنج فهله تولومبا کیمی آه چکیب ، گؤزدن ایته نه دک  سوزور قیزی آرخادان . بو حالدا اورادان اؤتن بیر موتورون جیرهاجیر سسی ده گنج فهله نین پوزا بیلمیر خیاللارینی . . . جومه آخشامی گون اورتا ساعات  12 دیر . گؤره سن ، سوربن اونیوئرسیته سینده نئچه دیر ساعات . یاخود قناری آدالاریندا دا بئله گون اورتادیرمی گوره سن  . گون به گون یئنی لشن قاپی لارین آرخاسیندان ائشییه دوورورام . تاختا لؤتکه دوشور یادیما ، قامیشلیق و چئوره سینده دولاشان آدین بیلمه دییم آغ آپباق اوچارلار . ساری باش گنج اوغلان ، او تاختا قاییق اوزه رینده ، نرمه نازییی اوتوردوب یانیندا ،قوشلاری ساییر اونا ؛   بیر ، ایکی ، ... اون بیر ، اون ای... .

« اون ایکی اولدو کرپیجلری گتیر داها » ، چیغیران بننانین زیغلی سسی گوللـه کیمی ، فهله نین قولاق پرده سینی ده لیب کئچیر . . .

منبع: یئنی لیک

تخمينا 50 ايل بوندان قاباق هله موغانين تاريخي وحشي چوللري الكتريك ميكانيك دميري تانيميردي .اطراف مئشه دن گليب آرازگوزوندن سوايچيب آغاجلاركولگه سينده مئه له نن دونوز، چاققال ،توراج ،قارتال ،چؤل پيشيگي،قاراباتداق وقيزيل شلاله سينه بنزه ين جئيران سوروسو هله تراكتور لارين قولاق اپاران سسيني ، سم سپن طياره لرين نعره سيني اشيتمه ميشلر.خوروزلي ماحاليندا سرت دوران آغ داغ اتك لريندن سوزو لرك آجي اشمه ني كئچيب قوچ قيشلاغينا انن جئيران سوروسو خوصوصيله بو هاي كوي دن كناريدي. ايند ي كي قند كار خاناسي يئرلشن تپه يه يئل آتان دئيرديلر.واخت اولوردو جئيران لار داهي شاعيرصمد وورغون دئميشكن :" يئردن آياغيني قوش كيمي اوزوب،ياي كيمي دارتينيب اوخكيمي سوزوب،يئنه ئوز سورونو نظاملا دوزوب"گؤيچك آرازدان سو ايچمك چون يئل آتان دانآشيرديلار.... گؤره نلر موغان جئيرانين بئله تعريف له ييرلر:بوينوزو گوده ،قارنينين آلتي چنه سيندن قويروغونا قده ر آغ و كوره يي بوزا ماييل،گوزلري ايسه ايري اولورميش.دئييلنه گوره موغان دا جئيران لارين اساس اوتلاغي و اوتراغي آجي اشمه دن اوسته آغ داغين ياماج لاري اولورموش.اونلار آنجاق اورادا قوراق ليق اولاركن سوسوزلوقدان آرازا دؤنرميشلر.ايند ي كي پارس آباد شهرينده مركزي پاسگاه دان آغ مازاراجاق خوصوصيله مركزي مخابراتين قاباغيندا كئچيدلر وارميش كي اونلارا جئيران سوواتي دئيرميش لر. جئيران لار،خلوت اولدوغوندان بورالاري اؤزلرينه يول كيمي سئچرلرميش. "پيشرفت"يا همان ايره ليله ييش بير گرچك اولاي كيمي دانيلمازدير ،آمما پارس آباد و اونون اطرافي مكانيزه اكينه اوز گتيره ن كيمي تاسوف كي ديل سيز جئيران لارين پايي بو تورپاغين اوزه رينده ،هئچ واخت كيمسه طرفيندننظرده توتولمادي ،هئچ بيراراده اونلارين حياتينين داوامينا حق وئرمه دي . بو سبب دن ده رويه سيز اوو ،سم،سس و باشقا حمله لرآرازين بو تاييندا جئيران لارين حياتينا سون قويديلار.اونلار يا اوولانديلار يادا كي آرازين او بيري تايينا اوز توتدولار . دئييلنه گؤره آزي 1340- جي ايلدن بو يانا داها موغان دا بيردنه ده اولسون جئيران گؤرونمه دي . بو دهشتلي دير،بعضا سوروسو 500 باشا چاتان جئيران لارين وحشي حياتي بو جورغريب جه سينه سونا يئتميش دير...1384ايلك باهار. آخشام كولك لري ايليق- ايليق اسير آياغيم الوان چيچك لره و اوتلارا دولاشا-دولاشا يئل آتان تپه جيك لريني آشيرام ،اونلاردان او چؤل قيزلاريندان هئچ بير ايزيوخدور ايندي اونلار يالنيز بو تپه جيك لرين خاطيره سينده ياشاييرلار!

نویسنده: ارسطو مجردی

منبع: مغان ارس